படித்ததில் பிடித்தவை (“மின்சாரக் கொசு மட்டை” – பிருந்தா சாரதி கவிதை)

 

*மின்சாரக் கொசு மட்டை*

 

“நானும் வேட்டைக்காரனாக மாறினேன்

மின்சார கொசு மட்டை வாங்கிய பிறகு.

 

வேறெங்கும் காட்ட முடியாமல்

அடக்கி வைத்த என் கோபமெல்லாம்

பீறிட்டுக் கிளம்புகின்றன

அடங்கா வெறி கொண்டு.

 

நம் ரத்தத்தைக் குடிக்கும்

எத்தனையோ பேரின்

ஒட்டு மொத்தவடிவமாகவும்

ஒரே குறியீடாகவும்

நினைக்கத் தொடங்கினேன்

கொசுவை.

 

கொலைவெறி கொந்தளிக்க

கொசுமட்டையை

ஏ.கே.47 ஆக பாவித்து

சுட்டுத் தள்ளத் தொடங்கினேன்.

 

சட்டத்தின் சந்து பொந்துகளில்

தப்பித்துப் பிழைக்கும் மோசடிப் பேர்வழிகளுக்கு

சற்றும் சளைத்தவை

அல்ல இந்தக் கொசுக்கள்.

 

மட்டையின் ஓட்டைகள் சட்டத்தின்

சந்துபொந்துகள் அளவிற்கு சுலபமானவையாக

இல்லாமல் போனாலும்

குற்றம் புரிந்துவிட்டு தப்பித்து வாழும்

மனிதர்கள் அளவுக்கு

சாமார்தியசாலிகளாக இல்லை கொசுக்கள்.

 

மட்டையில் மாட்டி

படபடவென்ற வெடியோசையோடு

மடிந்து விழுகின்றன.

 

வீழ்ந்தான் எதிரி

என்ற எக்களிப்பைத்

தருகின்றன

அவ்வோசைகள்.

 

ஆழ்மனதில்

நெடுங்கால ரகசிய இச்சையை

தீர்க்கின்றன பிணவாடைகள்.

 

இறகுப்பந்து ஆடுவது போல்

விளையாட்டாக நடந்து முடிகின்றன

கொத்துக் கொத்தாய் கொலைகள்.

 

இம்மட்டையை

வடிவமைத்தவன்

ஒரு மனோதத்துவ நிபுணன்.

 

உள்ளுக்குள் புதைந்து கிடக்கும்

ஆதிமனிதனின்

அடங்காத

வேட்டை வெறிக்கு

தீனிபோடும்

நவீன ஆயுதம் ஒன்றைக்

கண்டு பிடித்து விட்டான்.

 

என் போன்ற

எளியமனிதர்கள் கையிலும்

தண்டிக்கும் அதிகாரம் இருப்பதாய்

எண்ண வைக்கிறது அது.

 

அது கொசுக்களை மட்டும் அழிக்கவில்லை

அநியாயங்களைக்

கண்டும் காணாமல் இருக்கிறேன் என்ற

என் குற்ற உணர்ச்சியையும் சேர்த்தே அழிக்கிறது ஒருவகையில்.

 

அதைவிட முக்கியமானது

கொலைகூட செய்துவிட்டு

மனிதன் எப்படி உறுத்தல் எதுவும் இன்றி

வாழமுடியும் என்கிற

என் சரித்திர சந்தேகத்தைத்

தீர்த்து வைக்கிறது..!”

 

*பிருந்தா சாரதி*