படித்ததில் பிடித்தவை (“கிடைக்காத புத்தகங்கள்” – ஓடைக்கவிஞன் கவிதை)

 

*கிடைக்காத புத்தகங்கள்*

 

“முகநூலில் உறவுகளைத் தேடி

புலனத்தில் புன்னகைத்து

பற்றியத்தில் சிக்கிக் கொண்டு

படவரியில் பின்தொடரும்

காலமிது.

 

ஆறுதலுக்கு யாருமின்றி

அரவணைக்க கரங்களின்றி

அறையப்பட்ட சிலுவையில்

ஆணியாய் முதியோர் இல்லங்களில்

தாய் தந்தையர் கிடக்க

முகநூலில் அன்னையர் தின வாழ்த்துகள்.

 

முறைக்கு முன்னூறு தடவை

தந்தையர் தின குறுந்தகவல்கள்.

 

முதியவர்கள்

நூலகத்தில் தேடினாலும்

கிடைக்காத புத்தகங்கள்.

 

கடந்து வந்த நாட்களெல்லாம்

அனுபவமாய்

பட்ட கஷ்டங்களெல்லாம்

படிப்பினையாய்

பக்கம் பக்கமாக எடுத்துரைக்கும்.

பாவம் படிக்கத்தான்

யாருக்கும் நேரமில்லை.

 

முதியவர்கள் முழுநிலவுகள்

அமாவாசையென

அவர்களைத்

துரத்தி விட்டு

மின்விளக்கு ஏற்றி

இருளில் தொலைந்திட

வேண்டாம்..!”

 

*ஓடைக்கவிஞன்*