படித்ததில் பிடித்தவை (“இரு வார்த்தைகள்” – ராஜா சந்திரசேகர் கவிதை)

*இரு வார்த்தைகள்*

 

“சற்று வயது கூடிய

வேலைக்காரன்

தன் நுட்பம் கலையா

விரல் பாவங்களுடன்

மிக மெதுவாய்

மரம் அறுத்து

சரி பார்த்து

தக்கபடி பொறுத்தி

வடிவம் அளந்து

ஆணிகள் அடித்து

வருடிக் கொடுத்து

தன்னையே

ஒரு முறை பெயர்த்து

கிடத்தி

பின் எடுத்து

கண்ணோரம் வந்த

ஒரு சொட்டை

பொட்டு போல் வைத்து

துக்க வண்ணம் பூசி

மரத்துகள்களை

அப்புறப்படுத்தி

மஞ்சள் வெயில் பட

உருவாக்கிய சவப்பெட்டியை

பார்த்தபடி

இருக்கும்போது

அவன் உதடு

சத்தமின்றி சொல்கிற

இரு வார்த்தைகள்

உயிர் வந்திடுச்சி..!”

 

*ராஜா சந்திரசேகர்*