*பறக்காத வண்ணத்துப்பூச்சியின் பயணம்*

 

“ஓடும் ரயிலில்

ஒரு வண்ணத்துப்பூச்சி.

பறக்க இயலாமல்

நடைப்பாதையின் நடுவில்

ஊர்ந்து செல்கிறது.

இடை இடையே

சிறகை விரித்து

பறக்க முயற்சிக்கிறது

ஏனோ முடியவில்லை.

 

நல்ல வேலை

ரயிலில் கூட்டமில்லை.

பயணிகளின் காலில்

மிதி படாமல்

தப்பிக்க வேண்டும்.

அடுத்த ஸ்டேஷனில்

பயணிப்பவர்கள் ஏறுவதற்குள்

வேகமாக காற்றடித்தால்

வெளியே சென்றுவிடும்.

வேகமான காற்று வேண்டுமென

வேண்டிக் கொள்கிறேன்.

 

இறக்கையைப் பிடித்து

வெளியேப் போட்டிருக்கலாம்...

சிறுவயதில்

வண்ணத்துப்பூச்சியை

பிடிக்க முயற்சித்து

இறக்கை கையில்

ஒட்டிக் கொண்டதாக ஞாபகம்;

முயற்சிக்கவில்லை.

 

அடுத்த ஸ்டேஷனுக்குள்

நுழைய தொடங்கும் ரயில்.

அவசர அவசரமாக

ஏறும் வழியின் மின்விசிறியை

இயங்க வைக்கிறேன்.

அதன் பெருங்காற்றில்

வெளியே தள்ளப்படுகிறது

வண்ணத்துப்பூச்சி.

படப்படத்த மனது இதமாகிறது.

 

இரு வார வாழ்நாளில்

இன்னும் எத்தனை நாட்களோ..?

வாழட்டும் மகிழ்வுடன்..!”

 

 

*கி.அற்புதராஜு*