படித்ததில் பிடித்தவை (“அவளும் நானும்” – போகன் சங்கர் கவிதை)

 

*அவளும் நானும்*

 

“அவளுக்கு

ஏதோ ஒரு சந்தோஷம்

என்னைக் கேலி செய்கிறவர்கள்

எல்லோருடனும் சேர்ந்துகொள்கிறாள்.

ஒவ்வொரு முறை

அதை அவள் செய்கிறபோதும்

உன்னை நான் எவ்வளவு நேசித்தேன்

என்று சொல்லிக் காட்டுகிறாள்

என்று தோன்றும்.

 

யாருக்கோ கொடுத்திருக்க வேண்டியது

உனக்கு கொடுத்தேன்

என்ற வெறுப்பின் இளிப்பு

என்றும் தோன்றும்.

 

அல்லது

இருக்கும்போது நீடித்த

அந்த நேசத்தின் மதுரத்தை

இந்த கசப்புகளின் மூலம்

கரைக்கப் பார்க்கிறாளோ?

அதற்கு எவ்வளவு கசப்பு தேவைப்படுகிறதோ

அவ்வளவுக்கு

அவள் என்னை நேசித்தாள்

என்றிருக்கட்டும்

என்றும் நினைத்துக் கொள்கிறேன்.

 

இனி என்ன செய்வது?

ஓடம்

நதியைக் கிழித்துச்

சென்ற பாதையை

நதி மீண்டும் மூடிவிட்டது..!”

 

*போகன் சங்கர்*