*எலி*

 

“இன்று நான்

ஒரு எலியைப் பொறி வைத்து

கொன்று விட்டேன்.

வீட்டின்  பின்புறம்

தென்னை மர வேர்களுக்கருகில்

ஒரு குழித் தோண்டி

அந்த எலியைப் புதைத்தும் விட்டேன்.

ஏனோ மனம் பரிதவிக்கிறது

பாவமென்று..!

 

வீட்டுத் தோட்டத்தில்

வாழைக்கன்று அருகில்

குழித்தோண்டி கிழங்கைத் தின்றும்,

எந்த செடி வைத்தாலும்

அதன் வேர்களை கடித்தும்,

காரின் மின் கம்பிகளை

சேதப்படுத்தியும்

அட்டகாசம் செய்யும்

அந்த பெருச்சாலியை

கொல்வதைத் தவிர

அதை கட்டுப்படுத்த

என்னதான் என்னால்

செய்ய முடியும்..?

 

இருந்தாலும்

ஏனோ மனம் பரிதவிக்கிறது

பாவமென்று..!

 

வானொலியில்

‘கொன்றால் பாவம்

தின்றால் போச்சு...’

என கண்ணதாசனின்

பாவக் கணக்கைப்

பாடுகிறார் யேசுதாஸ்.

கொல்வதை எல்லாம்

தின்ன முடியுமா என்ன..?

 

மேஜையில் வீற்றிருக்கும்

கெளதம புத்தரை

மெளனமாக பார்த்தபடியே

அமர்ந்து இருக்கிறேன்

பாவ சுமையுடன் நான்..!”

 

*கி.அற்புதராஜு*