படித்ததில் பிடித்தவை (“சாமி செளக்கியமா?” – யுகபாரதி கவிதை)

 

*சாமி செளக்கியமா?*

 

யாரோ ஒருவர்

வரக்கூடாது என்பதற்காக

வாசற் கதவுகளை

அடைத்துவைத்திருக்கிறேன்.

 

உயிரச்சத்தின் விளைவாக

முகக்கவசங்களை

வகைக்கொன்றாக வாங்கியும்

நிச்சயமற்ற வாழ்வை

சலித்தும் சபித்தும் வருகிறேன்.

 

ஆறிலும் நூறிலும்

என்றெல்லாம் கதையளந்தவனே

எனினும், எதிர்கொள்ளும்

திராணியற்று

எரியூட்டப்படும் சடலவாடையை

மிகச் சமீபமாக நுகர்கிறேன்.

 

நெருங்கியவர், நெருங்காதவர்

என எல்லாருக்காகவும்

பிரார்த்திக்கிறேன்.

 

உருவுகண்டு எள்ளாமைக்கு

உதாரணமான அந்த ஒருவர்

ஊரைவிட்டல்ல,

உலகைவிட்டே ஒவ்வொருவரையும்

துரத்துகிறார்.

 

கத்தியாலும் கப்டாவாலும்

என்னைநான் காப்பாற்றிக்கொள்ள

வழியில்லை.

 

இந்த சாமி என்ற ஒருவர்

இருப்பதாக

எழுதியும் பேசியும் வந்தீர்களே

அந்த ஆளிடம் கேட்கத் தோன்றுகிறது,

‘அய்யா நீங்களாச்சும்

செளக்கியமா..?’

 

*யுகபாரதி*