படித்ததில் பிடித்தவை (“துணை” – காளிங்கராயன் கவிதை)

*துணை*

“அம்மா வகைப் பாட்டிக்கு இரண்டு பெண்கள்

ஆண் மக்களோடு சேர்த்து ஆறு பேருண்டு.

மூத்தவர் டெல்லியிலிருக்கிறார்

மத்திய அரசு அலுவலராக.

அடுத்தவரொரு தோல் கம்பெனியில்

அகமதாபாத்துக் கருகே.

மூன்றாமவருக்கு மதுரை கலக்ட்ரேட்டில் பணி.

அம்மாவும் சித்தியும் ஆளுக்கொரு திக்கில் வாழ்க்கைப்பட்டனர்.

கல்யாணமாகாத கடைசி மகனோ

ஊரூராய்ச் சுற்றும்

உரவிற்பனை யதிகாரி.

வருஷத்திற் கொருமுறை

குலதெய்வக் கொடை விழாவிற்கு

குடும்பக் காரரெல்லாம் கூடிக் களிப்பார்கள்.

பாசமும் பிணக்குமாய்

அன்பும் அதட்டலுமாய் அஞ்சாரு நாட்கழியும்.

அதன் பின்னர்

அடுத்த கொடைவரைக்கும்

தாத்தாவுக்கும் பாட்டிக்கும்

துணையாயிருப்பது -

முகப்பறைச் சுவர் முழுக்க

நிறைந்திருக்கும்

போட்டோக்களும்...

மீந்து போனதை

உண்டு கிடக்கும் -

வெள்ளையன் நாயும் தான்..!”

 

*காளிங்கராயன்*

(மவ்னம், ஆறு - ஜனவரி - 1994)