படித்ததில் பிடித்தவை (“ஒரே ஒரு கொப்புளம்” – கல்யாண்ஜி கவிதை)

*ஒரே ஒரு கொப்புளம்*

“எஞ்சியிருக்கும் 

ஜாகரண்டா மரங்கள்

மனப்பூர்வக் கருநீலத்துடன் 

பூத்துவிட்டன.

பங்க்ச்சர் ஒட்டுகிற, காற்றடைக்கிற

கரீம் பாய் முன் 

நீல நிற சைக்கிள் நிறுத்தியிருந்தான்

சீருடைப்பையன்.

மினுமினுப்புக் குறைந்துவரும்

கிழட்டுப் பழுப்புக் குதிரைகள் 

பூட்டிய சாரட்டில்

மலர் வளையங்கள் 

அசையச் செல்கிறது

நேர்த்தியான ஓர வளைவுகளுடன் 

சவப்பெட்டி.

சிலுவைக் குறியிட்டு 

விரல் முத்துகிறான் சிறுவன்.

காற்றடைத்த பின், 

சோதிக்கத் தடவிய

கரீம்பாயினுடைய எச்சிலில் 

திரண்டு உடைகிறது

சக்கரக் காம்பில் 

வாழ்வின் ஒரே ஒரு கொப்புளம்..!”

 

*கல்யாண்ஜி*