படித்ததில் பிடித்தவை (“மெளத் ஆர்கன் வாசிக்கும் பெரியவர்” – ராஜா சந்திரசேகர் கவிதை)

*மெளத் ஆர்கன் வாசிக்கும் பெரியவர்*

 

“கைகள் நடுங்க

மெளத் ஆர்கன் வாசித்துக்கொண்டிருந்த

முதியவரின் அருகில் போய்

அமர்ந்தேன்.

 

இலைகள்

மிதந்து மிதந்து

அவர் இசை

கேட்டபடி

அருகில் வந்து விழுந்தன.

 

மெளத் ஆர்கன்

ஒரு சிறு வாக்கியம் போல்

முன்பின் போய் வந்தது.

 

தியானம் போல்

அவர் முடித்து

மெல்ல கண் மூடியபோது

சொன்னேன்...

 

உங்கள் இசை

இளமையாக இருக்கிறது.

 

கண் திறந்து

புன்னகைத்துச்

சொன்னார்...

 

முதுமை இளமை

இசைக்குக் கிடையாது.

பிரித்துப்பார்ப்பதெல்லாம்

நாம்தான்..!”

 

*ராஜா சந்திரசேகர்*