நானும் எலும்பிச்சைச்செடியும்...

“வார நாட்களில்

காலையில்

குளிப்பதற்கு முன்

பாத்ரூமில் தண்ணீரை

திறந்துவிட்டு

ஞாயிற்றுக்கிழமை

செய்ய மறந்த

கை நகம் வெட்ட தொடங்கி

கால் நகம் முடிப்பதற்குள்...

வாளியிலிருந்து

வழிந்தோடும் தண்ணீரை

அப்பாவோ, அம்மாவோ

பார்த்தால்

நிறுத்தி விடுவார்கள்.

மனைவி பார்த்தால்

என்னை திட்டிக்கொண்டே

நிறுத்துவார்.

மகன் பார்த்தால்

நிறுத்திவிட்டு

அம்மாவிடம் சொல்லிவிட்டு

எனக்கு கிடைக்கும்

திட்டை ரசிப்பான்.

இதையெல்லாம் மீறி

வழிந்தோடும் தண்ணீரால்

பயனடையும்

எலும்பிச்சைச்செடியை

நினைத்து சந்தோசப்பட்டு

கொள்வேன் நான்..!”

  -  K. அற்புதராஜு.

குழந்தையுடன் ஒரு பயணம்...

“கோடைக்கால

மாலை வெயிலின் நசநசப்பு

எப்படியோ இடம் கிடைத்து

உட்கார்ந்து பயணித்த

பேருந்துப்பயணத்தில்...

எனதருகே குழந்தையுடன்

நின்ற தாய்க்கு எழுந்து

இடம் கொடுக்கலாமா?

என யோசித்த

ஷன நேரத்தில்...

‘குழந்தையை

வைத்துக்கொள்ளுங்கள்...’

என கொடுத்துவிட்டார்.

கொஞ்சமும்

எதிர்பார்க்கவில்லை...

குழந்தையுடன்

இனிமையான பயணம்

அந்த மாலைப்பொழுதில்..!”

         -   K. அற்புதராஜு.

படித்ததில் பிடித்தவை (செல்வராஜ் ஜெகதீசன் கவிதை)

குழந்தைக் கேள்விகள்?

“ஏன்

வீடு திரும்ப வேண்டும்?

ஏன்

சக்கரங்கள் சுழல்கின்றன?

ஏன்

அம்மா வேலைக்குப் போவதில்லை?

எங்கே போகிறார்கள் எல்லோரும்

இத்தனை வாகனங்களில்?

வளர்ந்த பின்தான்

வேலைக்குப் போகணுமா?

சாலையோரப் பூனைகளுக்கு

யார் சாதம் தருவா?

குழந்தைத்தனமாகவே இருப்பதில்லை

எப்போதும்

குழந்தைகளின் கேள்விகள்..!”

                               -  செல்வராஜ் ஜெகதீசன்.

படித்ததில் பிடித்தவை (லிங்குசாமி கவிதை)

 பால்யம்

“எனக்கான சட்டையை

எந்த நிறத்தில் தேர்ந்தெடுப்பது?

எனது கார்

எந்த நிறத்தில் இருக்க வேண்டும்?

நிறத்தைத் தேர்ந்தெடுக்கும்

நேரம் வரும் போதெல்லாம்

நினைவில் வந்து போகிறது...

கொல்லைப் புறத்தில்

ஈன்ற நாய்க் குட்டிகளில்

எதைத் தேர்ந்தெடுப்பது

என்று குழம்பிய

சிறு வயது ஞாபகம்..!”

                    -  இயக்குனர். லிங்குசாமி.

படித்ததில் பிடித்தவை (கனிமொழி கவிதை)

“கல்யாண நேரத்தில்

வீடு வெள்ளையடிக்கப்பட்ட போது

விட்டத்தில்

அவள் சொருகி வைத்திருந்த

கனவுகளுக்கும்

நிறம் மாற்றப்பட்டது..!”

                                 -   கனிமொழி.
[ஓவியம்: இளையராஜா]

[கனவுகளை கடிதங்களாக மாற்றினால்

ஹைக்கூ வடிவம் பெறுகிறது – சுஜாதா]

படித்ததில் பிடித்தவை (கபிலன் கவிதைகள்)

“யாரை ரொம்பப் பிடிக்கும்?

எதிர்பார்ப்புடன்

மகளைக் கொஞ்சுகையில்,

தோழியின் பெயரைச் சொல்லி

நட்பைப் பெருமைப்படுத்துகிறது

நர்சரி..!”

                                                      -   கபிலன்.

“எவ்ளோ வருஷமாச்சுடா பாத்து!”

என சிலிர்ப்புடன்

பெயர் சொல்லி அழைக்கும்

நண்பனுடன் பேசுகையில்

பயமாய் இருக்கிறது

“எம் பேரு ஞாபகமிருக்கா”

என கேட்டு விடுவானோ?

                                                     -   கபிலன்.

படித்ததில் பிடித்தவை (கல்யாண்ஜி கவிதை)

“நெடும்பொழுது

அனைத்தையும் அணிந்து

நடக்கிறோம்.

சிறுபொழுது

எல்லாவற்றையும் களைந்து

கிடக்கிறோம்.

உயர உயரப் பறக்கிற பறவை

ஒரோர்கனம் பறக்காமல்

மிதக்கிறது.

இப்படித்தான் இருக்கிறது

எல்லாமும்..!”

                                           -  கல்யாண்ஜி.

படித்ததில் பிடித்தவை (கவிதை)

“இருவிரல் குவித்துப்

பிடிக்கப்போகும் கணம்

அடுத்தடுத்த பூவுக்குப்

பறந்தமரும்

பட்டாம்பூச்சியைப் போல்

போக்குக் காட்டுகிறது 

குழந்தை

வீட்டுக்கு வரும்

அறிமுகமில்லாதவர்

அழைக்கையில்..!”

                         -   எழிலரசு.

ஹெல்மெட் செயல்கள்...

“பைக் சாவியோ...

கார் சாவியோ...

மற்றவர்களிடம்

கொடுக்கும் போது

அவர்கள் கைகளில்

வாங்கிக்கொள்ளாமல்

சாவியை

எதன் மீதாவது

வைக்கச் சொல்லி

எடுத்துச்செல்லும்போது

ஏதோவொரு

அசம்பாவிதத்தை

நினைவூட்டி

செல்கிறார்கள்..!”

-     K. அற்புதராஜு.

படித்ததில் பிடித்தவை (கவிதைகள்)

வேரடி நீரோட்டம்

“மாநகரப் பேருந்தில்

விளக்குகள் போடும்போது

கன்னத்தில் ஒற்றிக்கொள்பவரின்

கால்கள்

இன்னமும்

கிராமத்திலேயே இருக்கின்றன..!”

                            -   மணி ஜெயப்பிரகாஷ்வேல்.

பார்வை

“பண்டிகை நாளன்று

அம்மனுக்கு புடவை சாத்தி

தரிசிக்கும் கண்கள்

அதே இரவில் காத்திருக்கின்றன

நடன மங்கையரின்

ஆடை விலகலுக்காய்..!”

                                -   ந. சிவநேசன்.

(நன்றி: ஆனந்தவிகடன்)